Ein gutes neues Jahr 2013

Mia Ministrantn dean sche brav

drum merkt’s uns hiatz a bissl af

Ebs Neuch‘s kann nur entsteh
wann tuat des Alte geh

Des alte Jahr is aus und gar
drum wünschn ma, a guats neuchs Jahr
Was war des kina ma dankbar schau
was kimt braucht unsa Gottvertrau

So müassn mas beim Pfarrheim sehng
des Alte fesch, dann aus und gschehng

Van Altn kann ma mit Lob vazöhln
hiatzt müassn ma a Neuchs hinstöhln
Des braucht a Zamhalln e da Pfarr
Is unsa Aufgab, e den Jahr

s’Gotteshaus und s’Pfarrheim danebn
des is a Gwing für unsa Lebn

Wann ma lebn wolln en Gotts Nam
müassn ma schau, wo kema ma zam
Wo kina ma Gemeinschaft pflegn
de tuat uns guat und bringt an Segn

Ebs Neuchs en Lebn, des muaß ma sagn
des hebt ma a und muaß ebs wagn

Gehn mas a des Jahr gelassn
toan ma Muat und Hoffnung fassn
denka ma an Alt und Jung
s’Miteinand erhalt en Schwung

Gelt’s Gott, es tuat uns gfrei
was toats für uns es Körbl ei

(Gedicht verfasst von Johann Falkinger)